mukalma

woh

tum sotay kyuN nahiN
kiya buhat khaa liya hay
tum boltay kyuN nahiN
kuch tou bolo, kuch to batlao
taizaab hazaf goliaN khaa lo
majnoon e eh'd e haazir lay lo
aur kuch nahiN
tou calcium say lub'raiz
doodh ka glass hee pee lo
sukoon milay ga
need aa jaa'aye'gi
youN laitay laitay
kya taktay rehtay ho
kuh'r kay jaalouN ko toR ker
sub'h namoodar hu'a chahti hay
aur phir az sar e nau
wohi gardish e nau-paanch
tum sotay kyuN nahiN
tum boltay kyuN nahiN

hum

kaisay samjhaouN
kis kis ko samjhaouN
nahiN hay
yeh bay-cheeni jis'm ki
kay hay yeh khalish e rooh
rooh jo na yahaaN ki hay
na wahaaN ki
yeh izterab e rooh
dushman hay neend ki